اخي في الوطن يا من قمت بالنزول يوم 30 يونيو تخيل معي انك بعد سنوات ستحكي لابناء واحفادك عن يوم 30 يونيو تخيل معي الحوار ..
الاب : يا ابني احنا قمنا يوم 6/30/2013 بثورة عظيمة لمصر
الابن : وعشان الثورة تنجح يا بابا كام واحد اتقتل
الاب : لا يا بني ماحدش مات في الثورة
الابن : طيب الحمد لله يا بابا يعني كلها اصابات بس ؟
الاب: لا يا ابني ولا حتى كان فيه مصابين
الابن : ايه ده بجد يا بابا !! اول انا مرة اسمع عن ثورة كده بجد طيب يا بابا فضلتوا اد ايه معتصمين في الشوارع عشان الثورة تنجح
الاب : لا يا ابني احنا ما اعتصمناش
الابن : بجد يا بابا ؟؟ امال عملتوا ايه ؟
الاب : بص يا ابني احنا جمعنا بعض كده ورحنا على الميادين
الابن : اه يعني ماحدش راح الشغل و عملتوا اضراب مثلا وفضلتوا في الشارع من الصبح
الاب : بصراحة يا ابني الكذب خيبه احنا روحنا شغلنا عادي وبعدين نزلنا اخر النهار كده ع الساعه 7 المغرب اصل الجو كان حر اوي يا ابني
الابن : كمل لي يا بابا انا عايز اعرف انتوا عملتوا ايه تاني
الاب : احنا شيلنا اعلام مصر واشترينا فول ولب وترمس و اخدناك معانا انت كنت لسه صغير في اللفه وركبنا تاكس ورحونا الثورة شويه من الناس فضلوا يهتفوا والباقي قعد
الابن : اكيد قعدوا علشان كان ناويين يعتصموا
الاب: لا يا ابني الناس كانت قاعده تاكل اللب والفول وتتصور وهما شايلين علم مصر بلدنا العظيمة
الابن : وطبعا يا بابا انت عانيتوا وقاومتم الجنود اللي كانوا بيحاولوا يمنعكوا من التظاهر زي مابيحصل في اي ثورة في العالم
الاب : لا يا ابني بالعكس دا الظباط والعساكر كانوا معانا ووزعوا علينا عصير وميه ساقعه وجوايز
الابن : بجد يا بابا ؟؟ ده انا مستغرب جدا وبعدين مشيتوا امتى
الاب : بص يا ابني احنا كلنا مشينا كده ع الساعه 1 انت عارف احنا عندي شغل الصبح وغياب اليوم بثلاث ايام خصم
الابن : بابا هي دي ثورة ولا حلفه ليالي التليفزيون انت بتهزر معايا صح؟
الأربعاء أغسطس 09, 2017 5:35 pm من طرف 
